Zum Hauptinhalt springen

Amtshülff

Kolumne Richard Ehrensperger

Ch bin iez schüst is Alter ggrutscht, won äim de Tokter mues beaugöpflen und beoormuschle, seb mer no all Cheerzli am Baum heig und all Tassen im Schrank, zum wiiters chönen Auto faare. Oder gob er äim gsundhäits- oder zuestandshalber mües zum Vercheer uus zie, wie me säit. Gschmoge bin i dur all Tescht duur choo. Sogaar en Uur hän i mit allne zwölf Stundezäie chöne zäichnen und hän e Zäigerstelig druff proocht, wo de grooss Zäiger de chlii fascht verteckt: zwoo Minuute vor halbi sächsi. 17:28 hän i drunder gschribe, wil i au di digitaali Ziitnotazioon hä müese belege. S seig ales guet, säit de Tokter, aber er chöm nüd drumumen, em Amt die Medikamänt z mälde, won i regelmèèssig mües nèè, Daateschutz hiin oder hèèr.

Prompt schickt mer s Straassevercheersamt en Aart es Gratulazi- oonsschriibe zur Verlèngerig vom Automobilischte-Staatuss. Debii isch aber no e grüens Mèrkblatt, wo druf vom ene mediziinischen «Uuswiis», eme «Pass» und eme «Tagibuech» d Reed isch, won ich mües füeren und/oder bin ere Vercheerskontrole voorwiise. Uuskümpft gèbi s Amt für Rächtsmediziin. Wil i käis vo dènen uufgfüerte Tokumänt käne, schick i dèm Amt es Meil mit em Beträff «grünes Merkblatt». Und de Bitt, si möchtid miir die drüü Sache schicke, wo da druff stönid oder miir säge, won i s überchöm. En Maa mit Toktertitel schriibt drufabe, «Pass» und «Büchlein» chöm i vo mim Tokter über und s grüen Mèrkblatt vom Straassevercheersamt. Ich schriibe zrugg, das Mèrkblatt heig i scho, wäge dèm seig i ja überhaupt uf miini Fraage nach de drüü Tokumänt choo, wo miir fèèlid. Und iez schriib er no vom ene vierte, eme «Büchlein», was dänn daas seig. «Wir sind nicht das Strassenverkehrsamt», schriibt doo dè Maa mit Toktertitel zrugg, «ich werde Ihnen aber ein solches Exemplar zukommen lassen.»

Raated Si, was i zwee Tääg spööter phèr Briefposcht überchoo hän. . . Nomool son e grüens Mèrkblatt.

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch